ਦੁਨੀਆਂ ਦੇ ਕੁੱਝ ਦੇਸ਼ਾਂ ਵਿੱਚ ਮੁਫ਼ਤ ਹਨ ਜਨਤਕ ਆਵਾਜਾਈ ਦੇ ਸਾਧਨ। ਆਓ ਤੁਹਾਨੂੰ ਇਨ੍ਹਾਂ ਦੇਸ਼ਾਂ ਬਾਰੇ ਜਾਣਕਾਰੀ ਦਿੰਦੇ ਹਾਂ।

ਲਗਜ਼ਮਬਰਗ

ਜਰਮਨੀ, ਬੈਲਜੀਅਮ ਅਤੇ ਫ਼ਰਾਂਸ ਵਰਗੇ ਦੇਸ਼ਾਂ ਨਾਲ ਘਿਰਿਆ ਲਗਜ਼ਮਬਰਗ ਦੁਨੀਆ ਦਾ ਪਹਿਲਾ ਅਜਿਹਾ ਦੇਸ਼ ਬਣ ਗਿਆ ਹੈ, ਜਿੱਥੇ ਜਨਤਕ ਆਵਾਜਾਈ ਦੇ ਸਾਧਨ ਸਾਰਿਆਂ ਲਈ ਮੁਫਤ ਹਨ। ਲਗਜ਼ਮਬਰਗ ਵਿੱਚ ਇਹ ਯੋਜਨਾ 29 ਫਰਵਰੀ ਤੋਂ ਲਾਗੂ ਹੋ ਚੁਕੀ ਹੈ। ਇਹ ਯੂਰੋਪ ਦੇ ਸਭਤੋਂ ਛੋਟੇ ਦੇਸ਼ਾਂ ਵਿੱਚੋਂ ਇੱਕ ਹੈ। ਪਰ ਇੱਥੇ ਭਿਆਨਕ ਜਾਮ ਲੱਗਦਾ ਹੈ। ਇੱਥੇ ਦੀ ਆਬਾਦੀ ਸਿਰਫ 602,000 ਹੈ।

ਟਾਲਿਨ, ਐਸਟੋਨੀਆ ਦੀ ਰਾਜਧਾਨੀ

ਬਾਲਟਿਕ ਸਮੁੰਦਰ ਅਤੇ ਫਿਨਲੈਂਡ ਦੀ ਖਾੜੀ ਦੇ ਬਾਰਡਰ ਉੱਤੇ ਵਸੀ ਐਸਟੋਨੀਆ ਦੀ ਰਾਜਧਾਨੀ ਟਾਲਿਨ ਵਿੱਚ 5 ਸਾਲ ਪਹਿਲਾਂ ਸਾਲ 2013 ਵਿੱਚ ਮੁਫਤ ਜਨਤਕ ਟਰਾਂਸਪੋਰਟ ਲਾਗੂ ਕੀਤਾ ਗਿਆ। ਲੋਕਾਂ ਵਲੋਂ ਬਕਾਇਦਾ ਮੁਫਤ ਟਰਾਂਸਪੋਰਟ ਦੇ ਮੁੱਦੇ ਉੱਤੇ ਵੋਟਿੰਗ ਕਰਾਈ ਗਈ, ਜਿਸ ਉੱਤੇ 75 ਫ਼ੀਸਦੀ ਲੋਕਾਂ ਨੇ ਹਾਮੀ ਭਰੀ। ਲੋਕਾਂ ਨੂੰ ਕੇਵਲ ਆਪਣੇ ਆਪ ਨੂੰ ਸ਼ਹਿਰ ਦੇ ਨਾਗਰਿਕ ਦੇ ਤੌਰ ਰਜਿਸਟਰ ਕਰਾਣਾ ਸੀ ਅਤੇ ਗਰੀਨ ਕਾਰਡ ਲਈ 2 ਪਾਊਂਡ ਭਰਨੇ ਸਨ। ਪਰ ਐਸਟੋਨੀਆ ਦੇ ਹੋਰ ਹਿੱਸਿਆਂ ਤੋਂ ਇੱਥੇ ਆਉਣ ਵਾਲੇ ਦਰਸ਼ਕਾਂ ਅਤੇ ਸੈਲਾਨੀਆਂ ਨੂੰ ਟਾਲਿਨ ਨੈੱਟਵਰਕ ਦੀਆਂ ਬੱਸਾਂ, ਟ੍ਰਾਲੀ ਬੱਸਾਂ, ਟ੍ਰੇਨ ਅਤੇ ਟ੍ਰਾਮ ਦੇ ਇਸਤੇਮਾਲ ਲਈ ਪੈਸੇ ਭਰਨੇ ਪੈਂਦੇ ਹਨ। ਇਹ ਸਕੀਮ ਇੰਨੀ ਮਸ਼ਹੂਰ ਹੋਈ ਕਿ ਐਸਟੋਨੀਆ ਦੀ ਸਰਕਾਰ ਹੁਣ ਪੂਰੇ ਦੇਸ਼ ਦੀਆਂ ਬੱਸਾਂ ਵਿੱਚ ਯਾਤਰਾ ਮੁਫ਼ਤ ਦੀ ਤਿਆਰੀ ਕਰ ਰਹੀ ਹੈ।

ਬੈਲਜੀਅਮ ਦਾ ਹੱਸੇਲਟ

ਹੱਸੇਲਟ, ਬੈਲਜੀਅਮ ਵਿੱਚ, ਲਿੰਬਰਗ ਪ੍ਰਾਂਤ ਦੀ ਰਾਜਧਾਨੀ ਹੈ। ਇੱਥੇ ਪਬਲਿਕ ਟਰਾਂਸਪੋਰਟ ਵਿੱਚ ਕਿਰਾਇਆ ਸਾਲ 1997 ਵਿੱਚ ਹੀ ਖਤਮ ਕਰ ਦਿੱਤਾ ਗਿਆ ਸੀ। ਇਸ ਕਦਮ ਲਈ 2006 ਤੱਕ ਸਵਾਰੀਆਂ ਦੀ ਗਿਣਤੀ ਵਿੱਚ 13 ਗੁਣਾ ਵਾਧਾ ਹੋਇਆ। ਇਸ ਸਕੀਮ ਨੂੰ 19 ਸਾਲ ਬਾਅਦ ਖਤਮ ਕੀਤਾ ਗਿਆ। ਪਰ ਹੁਣ ਵੀ 19 ਸਾਲ ਤੋਂ ਘੱਟ ਉਮਰ ਦੇ ਲੋਕ ਮੁਫਤ ਵਿੱਚ ਯਾਤਰਾ ਕਰ ਸਕਦੇ ਹਨ।

ਦਿੱਲੀ

ਸਾਲ 2020 ਦੀਆਂ ਦਿੱਲੀ ਵਿਧਾਨ ਸਭਾ ਚੋਣਾ ਤੋਂ ਕੁੱਝ ਮਹੀਨੇ ਪਹਿਲਾਂ ਦਿੱਲੀ ਵਿੱਚ ਵੀ ਔਰਤਾਂ ਲਈ ਮੁਫਤ ਜਨਤਕ ਟਰਾਂਸਪੋਰਟ ਦੀ ਯੋਜਨਾ ਸ਼ੁਰੂ ਕੀਤੀ ਗਈ। ਇਸ ਯੋਜਨਾ ਤਹਿਤ ਔਰਤਾਂ ਸਾਰੀਆਂ ਡੀਟੀਸੀ, ਕਲਸਟਰ ਬੱਸਾਂ ਵਿੱਚ ਮੁਫ਼ਤ ਯਾਤਰਾ ਕਰ ਸਕਦੀਆਂ ਹਨ।

ਜਰਮਨੀ ਵੀ ਤਿਆਰੀ ਵਿੱਚ

ਜਰਮਨੀ ਦੀ ਸਰਕਾਰ ਸਭ ਤੋਂ ਪ੍ਰਦੂਸ਼ਿਤ ਸ਼ਹਿਰਾਂ ਵਿੱਚ ਜਨਤਕ ਆਵਾਜਾਈ ਦੇ ਸਾਧਨਾਂ ਨੂੰ ਮੁਫਤ ਕਰਨ ਦੀ ਯੋਜਨਾ ਬਣਾ ਰਹੀ ਹੈ, ਤਾਂ ਕਿ ਜ਼ਿਆਦਾ ਤੋਂ ਜ਼ਿਆਦਾ ਲੋਕ ਆਪਣਾ ਵਾਹਨ ਛੱਡਕੇ ਜਨਤਕ ਆਵਾਜਾਈ ਦੇ ਸਾਧਨਾਂ ਵਿੱਚ ਸਫਰ ਕਰਨ। ਇਸ ਯੋਜਨਾ ਲਈ ਜਰਮਨੀ ਦੇ ਸਭ ਤੋਂ ਪ੍ਰਦੂਸ਼ਿਤ ਸ਼ਹਿਰ ਬਾਨ, ਏਸੇਨ, ਰਾਟਲਿੰਗਨ, ਮੈਨਹਾਈਮ ਅਤੇ ਹੇਰਨਬਰਗ ਨੂੰ ਚੁਣਿਆ ਗਿਆ ਹੈ। ਵੱਧਦੇ ਹਵਾ ਪ੍ਰਦੂਸ਼ਣ ਨਾਲ ਜੂਝ ਰਹੇ ਜਰਮਨੀ ਉੱਤੇ ਯੂਰੋਪੀ ਯੂਨੀਅਨ ਦਾ ਜ਼ਬਰਦਸਤ ਦਬਾਅ ਹੈ। ਈ.ਯੂ. ਨੇ ਵਧਦੇ ਹਵਾ ਪ੍ਰਦੂਸ਼ਣ ਨੂੰ ਲੈ ਕੇ ਜਰਮਨੀ ਉੱਤੇ ਜੁਰਮਾਨਾ ਲਗਾਉਣ ਦੀ ਚੇਤਾਵਨੀ ਦਿੱਤੀ ਹੈ।